هموت أزاى

هموت وانا رافع علامة النصر
هموت بعد صلاتى العصر
هموت كتير دا موتى ماله حصر

هموت اسد مش جبان
هموت واقف برجلى فى الميدان
هموت انسان

هموت وعينى مفتوحه على بلادى
هموت وكل عضمه فيا بتنادى
بلادى بلادى
 
هموت صابر
هموت صوتى اذان الفجر
يأذن فى السكوت فيصحى البدر
هموت من البرد
هموت متغطى بالشال اللى غرقان دم
هموت من الهم

هموت مخنوق من الغاز
ده شئ اعجاز
بنتنشأ عليه
بنتقاتل عليه
طيب تصدره ليه
هموت من الحيره
هموت من الدمعه الفقيره

هموت وانا كاتب وصيه لمصر
مش عايز فدمى فلوس
و ......الديه
خدوها هديه
إدونى كرامه وانسانيه

انا عايز لامى الفخر
مش عايز تذلوها دهر
بموت من القهر
روحى بتتنقل من جسم شخص
لتانى شخص

انا روحى مصر
روح واحده ويجى كام مليون جسد
شامم روايح مسك خارجه من الجسد
فهموت سعيد
لان روحى خرجت لاجل ما يحيا الجسد
ولان مصر عاشت ما انتهيتش
وكفايه انى مت خالد ومتنستش