ثــــور

فى بلادى ... كله عادي
كل شئ أصبح روتينى وأعتيادى
ظلم , سحل , قتل ماشي
فلما يشتد الألم
ولا يصيبك الملل
غير الواقع ’ وثور
تلقى دايرة الملل
بتكُب نور
شوية رفاقة لمتهم جت ع العلم
طحنوا الألم بالطوب
حدفوٌه لغاية ما استجار
فقلبت هزار
كنا بنلعب ثورة وعساكر
شوية يجوا يقفوا ضدنا
نحدف قنابل من التراب
وهم يردوا بالقوالح علي صفنا
كان إعتصامنا كرنفال
شعر ومغنى ومطربين
ودروس سياسة وهناجر
كنا كمتحف للثوار بنتفاخر
ووقت الهجوم يضرب نفير
حبه يأمنوا خيمة البنات
وحبه يرجعوا ع المستشفيات
فى شلة ترجع تأمن ع البوبات
اللى معاه ماسك يطلع على خط التماس
واللى معاه الاعلام يتمترس بساتر
الا الشهدا تتشاهد وتفف قدام سواتر
فلما يشتد الألم
ولا يصيبك الملل
غير الواقع ’ وثور
تلقى دايرة الملل
بتكُب نور
افتكر دم الشهيد بيفور
سعتها بس هتبطل تدور
فى ساقية الكأبة وعجلة الجنون
لحظات وهتستلذ حالا بالسكون
كل الجراح بتتنسي وبتهون
لما تفتكر الجراح
ولما تجيب فى سيرة اللى راح
هتشوف جراحك بتستراح
فقلب فى ذكريات 3 سنين
ساعتها حتحس بحنين
ساعتها هيخف الملل ويغور
فغير الواقع والقدر والكون .. وثور

عن الوطن

عن النفاق وعن الآلم

عن العذاب وعن اللى داب من الملل

عن شعب نايم فى العسل

هكتب قصيدة فى حب الوطن

فى حضن الوطن كبرت بدري

اكلت متسرطن ومهري

فى حضن نيل جى يجرى

شربت مية صرف صحى

وعن جبال بتطلعها الجثث

وعن عيال ماتت بتبيع الأمل

وعن شباب متمترس بكوبرى

هكتب وطن . لا ياء خطاب ولا ياء تملك

طول ما الكلاب بيحموا قطعان الديابه

طول ما الناس لساها غلابه

طول ما المجلودين بينتظروا البيادة

طول ما الزمن راضخ لهم

مش ممكن انسب نفسي لفجرهم

هكتب وطن . لا ياء خطاب ولا ياء تملك

هكتب غريب ’

عابر سبيل ,

اسير ذليل

هيفضل اسمى مكتوب بالرصاص

يأما ممكن اوضحه يأما ممكن الغيه خلاص

لغاية يوم ما الثورة تحكم

لغاية يوم ما الفقرا تملك

هكتب وطن . لا ياء خطاب ولا ياء تملك

نيرون

كهارب بتضوى ويفط بالنيون

وبوستر مدلدل لمستر نيرون

نبايع .. نأيد .. نرشح سعادته

ننافق دقايق هنكسب ساعات

ولما يغضب قائدنا الهمام

ننزل نفوض ونضرب سلام

قائد بالسليقة ...

حافظ لكل ربوع الطبيعة

ولكن مصمم ياخدها .. بنفس الطريقة

بنفس المعسكر ونفس الكتيبة

بنفس الوشوش القديمة الكئيبة

بنفس الخريطة ... اكيد هنوصل لنفس النتيجة

ياأما نكمل طريق الكفاح

يأما هنصبح محلل لعقد السفاح

وبأقصى التفائل هيصبح نكاح

محدش يقولى مؤمرات خارجية

دي هية هية نفس الوصية

ونفس العبيد ونفس الوسية

ونفس المحامي ونفس القضية

معندناش مؤمرات اجنبية

دي خلاصة صناعتنا الوطنية

مش عشان حبة ظلام

نولع فى روما ولو فى المنام

نضحي بشباب ... عشان الكهوول

نضحي بثورة .... عشان العجوول

سيادة نيرون ....

قائد اعالى جيوش الرومان

اعقل شوية وسيب الفتيل

اعقل يا سيد ده ممكن تطير

وممكن فى ثانية تهد المكان

فلو لسه ناوي تولع حرايق

تذكر ياسيد حرايق نيرون

ولع فى روما فصابه الجنون

عايش شهيد

شهيد وعايش وسطكم 

بشرب وباكُل ...

بس مش محسوب لكم

عايش شهيد

أصلى اتقتلت بجهلكم

---------------------

من غير كفن

من غير نُصب

من غير محاكمة

وحتى من غير العلم

انا اللى ثوره صحتني

ورجعت مت بظلمكم

-----------------

من غير رصاص

انا قتلنى الأنكســــــــار

كل ما اتعب فى حُبك

تسلمى لأول حمـــــــار

اهتف ليالى واعتصم

اصحى على صوت الجبان بيبتسم

ماسك سلاحه فوق دماغى 

عامل حرس ... 

وهو بيقيد فى صوتى بالخرص

---------------------

نصرخ شمال ..

تجروا لابعد نقطة فى الطرف اليمين

نقول كرامة ..

تسلمونا فى دمنا لاقرب كمين

----------

نطلب زيادة

تطلبوا رفع البيادة

عايزين ايه مننا

-----------

عيزنا نكفر 

ولا نهج منها كلنا

هتعيشوا عمركم مع عمرنا

حلوا عنها وعننا 

سيبوها تحمل مرة من نور الأمل

بتغصبوها ع العجوز

وتطلقوها وترجعوها بمحلل تانى وتالت من العسس

وقسيمة الطلاق دستور قديم

وتجوزها بالتاني على دستور لئيم

سيبوها بـــكر لحد يجي مننا

سيبوها طاهرة

سيبوها مرة تضمنا

خصوصا بقى .. اننا 

دفعنا مهرها من دمنا

بنحبها الحب العفيف ... 

حب ناسك للمسى

بخبثكم بقت زنا

امتى هتفهموا بقي زينا

امتى تخافوا ربنا

---------------

ولكل ذلك .....

عايش شهيد

بموت ساعات وساعات وحيد

بس موتى فى غربتى انا عنها

ويوم ما اودع حيكم هكون عريس

هكون لها وهكون معاها فى جنتي

ومن الاخر كده 

لو هى فى الدنيا لكم

الاخرة بقى بتاعتنا احنا لوحدنا

اخدتوا واحده عمرها عدا الالاف

واحنا اخدنا حُور عُفاف

انا الميــــــدان

انا الميــــــدان
أنا الشرف وانا الرجال
انا الورد اللى طارح دم
وعطره معبأ فى المكان
انا الزمان

انا القناطر والكبارى والمتاحف والأثار
انا الثورة انا الانسان
انا الصوانى الخضرة وخيام السلام
مسعى الكرامة
بئر زمزم للشهامة
انا الصحبة وانا الرفاقة
انا الشاى اللى بيغلى من السعادة
انا الجبنة اللى اتقسمت من الإعاشة

انا اللى اهل الحق شدولى الرحال
انا اللى طلبني طفل صار عندى من الرجال

فى رجم ابليس واعوان الجبان
واخد نيشان ,
وبدج للعين الشمال

انا الميدان
انا الطوب وانا البشر
فى كل شبر مات بطل
وفي كل حته سقط حجر
انا اللى حررت الوطن

انا الغضب
انا اللى الباطل مقدرش عليه
انا اللى الخبث متلائم عليه
ومهما طال بي الزمان
ومهما دنسوا بيا الجزم
ومهما مسحوا النقش من فوق الحيطان
انا باقى  انا منصان
انا  الزمان
انا الميدان